Tecendo con fío

 Así traballou o alumnado de 5 anos as constelacións. Que vos parece?

Imprenta artesanal e creatividade coa Biblioteca Creativa

 A semana pasada visitounos Alouette Machine, unha imprenta itinerante que recupera a técnica artesanal da tipografía. Dentro do proxecto de Biblioteca Creativa, realizamos un obradoiro práctico no que participou todo o alumnado do centro, desde 4º de Educación Infantil ata 6º de Primaria.

Durante a actividade, as nenas e nenos puideron experimentar co deseño e a impresión manual, empregando letras de madeira e tintas sobre papel. Cada grupo achegou a súa creatividade para contribuír á decoración dun novo espazo común no centro, pensado para favorecer a cohesión de grupo, o benestar emocional e a convivencia.
Foi unha experiencia moi enriquecedora, que mesturou expresión artística, traballo colaborativo e aprendizaxe significativa. Moitas grazas a Alouette Machine por acompañarnos nesta aventura creativa!

 

 

Tedes máis vídeos no Instagram do cole. 

Este foi o resultado final das nosas impresións:

As familias, teñen algo que ensinarnos

  Queremos agradecer á mamá de Thiago, Valentina e Alba que ao longo deste trimestre achegáronse á aula de 5 anos para realizar obradoiros artísticos co alumnado. Foron actividades creativas, divertidas e moi enriquecedoras, nas que a arte e ás emocións serviron de ponte entre escola e familia. Grazas por compartir o voso tempo, entusiasmo e saber facer!

Día das Letras Galegas

  Hoxe celebramos o Día das Letras Galegas cunha xornada de convivencia no CEIP As Bizocas. Gozamos coa actuación das cantareiras Abiñadoira de Sanxenxo, e xuntos cantamos, tocamos e bailamos unha canción preparada previamente. 

Foi un encontro cheo de emoción, onde a lectura saíu das páxinas para converterse en música, movemento e comunidade.

Durante esta xornada:

• Falamos do libro e do legado das cantareiras na nosa cultura.

• Cantamos, tocamos e bailamos todos xuntos unha canción tradicional galega, sentindo a forza da unión e da tradición.

• Reflexionamos sobre o valor da música como forma de expresión, de resistencia e de celebración colectiva.

Foi unha experiencia inesquecible onde, máis alá da lectura, compartimos vivencias, risos e emocións, mantendo viva a memoria e o espírito das cantareiras galegas que tanto teñen contribuído á nosa identidade.

“Canta, miña compañeira” converteuse así nunha chamada a seguir cantando, a seguir unidas e unidos arredor da nosa lingua e das nosas raíces.

Para rematar, participamos nunha divertida busca do tesouro internivel, organizada polo alumnado anfitrión. Como agasallo, levamos para casa un fermoso chaveiro feito por eles/as. Un día cheo de música, colaboración e amor pola nosa lingua e cultura! 📚🎶

Conto colaborativo pola semana do libro

 Un conto creado entre todos e todas! 📖✨

Durante a Semana do Libro, puxemos en marcha a creación dun conto creativo e colaborativo, enmarcado no noso PDI centrado na literatura.

O alumnado de 3º foi o encargado de dar vida á historia inicial: inventaron a idea principal e ilustraron os primeiros personaxes e escenarios. A partir de aí, cada curso do centro foi continuando a historia, engadindo novas aventuras, xiros inesperados e moita imaxinación.

O resultado foi un conto único, feito a moitas mans, no que cada grupo deixou a súa pegada. Un proxecto que puxo en valor a creatividade, o traballo en equipo e, sobre todo, o pracer de crear e compartir historias.

Porque cando lemos… vivimos mil vidas! 

SEMANA DO LIBRO

 📚Celebramos o Día do Libro... no teatro!

Con motivo do Día do Libro, desprazámonos ao auditorio de O Grove para desfrutar dunha adaptación teatral do clásico de Herman Melville: Moby Dick ou A Balea Branca.

A través desta historia de 1851, que narra a obsesiva e autodestructiva persecución dun gran cachalote branco por parte do capitán Ahab e a súa tripulación, achegámonos tamén a mensaxes moi actuais.

Falouse da contaminación mariña, da inxesta de plásticos polos animais, e da necesidade de protexer as especies ameazadas, como as baleas.

Un xeito diferente e moi enriquecedor de celebrar a lectura, combinando literatura, teatro e conciencia ambiental.

Actividade posterior relacionada coa obra:

 

Obradoiro de xabóns artesáns

  O alumnado de 4º, 5º e 6º de primaria participou nun obradoiro de elaboración de xabóns caseiros, impartido pola nai de dous nenos do centro.

A actividade está enmarcada dentro do proxecto Depoemprende, no que estamos a traballar aspectos como a creación de produtos, a organización cooperativa e o espírito emprendedor.

Aprendemos o proceso de elaboración, os ingredientes naturais e a importancia de coidar os detalles na produción artesanal 🫧

Unha experiencia educativa na que conectamos aprendizaxe, creatividade e colaboración entre escola e familias.

 

 

🎨✨ A arte entra na escola: artistas locais no noso cole

 Ao longo destes meses, tivemos a sorte de recibir no centro a varios/as artistas locais, que compartiron co noso alumnado o seu talento, a súa paixón e a súa experiencia creativa.

A través de diferentes obradoiros e encontros, achegáronnos ao mundo da pintura, escultura, ilustración, fotografía, música, cine... e outras expresións artísticas que forman parte da identidade cultural da nosa contorna.

Esta iniciativa ten como obxectivo dar valor á creación artística, visibilizar o traballo dos/as creadores/as do noso entorno e ofrecer ao alumnado referentes reais, próximos, que lles mostren que a arte tamén pode ser un camiño vital e profesional.

Aquí vos deixamos un vídeo resumo dalgúns deses momentos cheos de cor, emoción e aprendizaxe:

Grazas a todas as persoas que nos visitaron por facer da escola un espazo aínda máis creativo e inspirador. Seguiremos enchendo as aulas de arte e expresión!

Unha mañá deliciosa con tortitas integrais!

 Esta semana, na aula de Educación Infantil, vivimos unha experiencia moi saudable: preparamos as nosas propias tortitas usando fariña integral! As nenas e os nenos participaron en cada paso da receita, desde medir os ingredientes ata ver como se cociñaban as tortitas e por suposto, saboreándoas con mel, sirope de arce e un pouquiño de chocolate 🫣

O resultado foi unha merenda riquísima e un momento compartido cheo de aprendizaxes. Foi todo un éxito!

 

 

Eduemprende- programa Atrévete

 O alumnado de 5° e 6° de Educación Primaria visitou hoxe o CIFP Politécnico de Santiago de Compostela a través do Programa Eduemprende- Atrévete a ter unha idea, onde coñeceron diversas ofertas formativas fomentando así o seu pensamento emprendedor.