Conto colaborativo pola semana do libro

 Un conto creado entre todos e todas! 📖✨

Durante a Semana do Libro, puxemos en marcha a creación dun conto creativo e colaborativo, enmarcado no noso PDI centrado na literatura.

O alumnado de 3º foi o encargado de dar vida á historia inicial: inventaron a idea principal e ilustraron os primeiros personaxes e escenarios. A partir de aí, cada curso do centro foi continuando a historia, engadindo novas aventuras, xiros inesperados e moita imaxinación.

O resultado foi un conto único, feito a moitas mans, no que cada grupo deixou a súa pegada. Un proxecto que puxo en valor a creatividade, o traballo en equipo e, sobre todo, o pracer de crear e compartir historias.

Porque cando lemos… vivimos mil vidas! 

SEMANA DO LIBRO

 📚Celebramos o Día do Libro... no teatro!

Con motivo do Día do Libro, desprazámonos ao auditorio de O Grove para desfrutar dunha adaptación teatral do clásico de Herman Melville: Moby Dick ou A Balea Branca.

A través desta historia de 1851, que narra a obsesiva e autodestructiva persecución dun gran cachalote branco por parte do capitán Ahab e a súa tripulación, achegámonos tamén a mensaxes moi actuais.

Falouse da contaminación mariña, da inxesta de plásticos polos animais, e da necesidade de protexer as especies ameazadas, como as baleas.

Un xeito diferente e moi enriquecedor de celebrar a lectura, combinando literatura, teatro e conciencia ambiental.

Actividade posterior relacionada coa obra:

 

Obradoiro de xabóns artesáns

  O alumnado de 4º, 5º e 6º de primaria participou nun obradoiro de elaboración de xabóns caseiros, impartido pola nai de dous nenos do centro.

A actividade está enmarcada dentro do proxecto Depoemprende, no que estamos a traballar aspectos como a creación de produtos, a organización cooperativa e o espírito emprendedor.

Aprendemos o proceso de elaboración, os ingredientes naturais e a importancia de coidar os detalles na produción artesanal 🫧

Unha experiencia educativa na que conectamos aprendizaxe, creatividade e colaboración entre escola e familias.

 

 

🎨✨ A arte entra na escola: artistas locais no noso cole

 Ao longo destes meses, tivemos a sorte de recibir no centro a varios/as artistas locais, que compartiron co noso alumnado o seu talento, a súa paixón e a súa experiencia creativa.

A través de diferentes obradoiros e encontros, achegáronnos ao mundo da pintura, escultura, ilustración, fotografía, música, cine... e outras expresións artísticas que forman parte da identidade cultural da nosa contorna.

Esta iniciativa ten como obxectivo dar valor á creación artística, visibilizar o traballo dos/as creadores/as do noso entorno e ofrecer ao alumnado referentes reais, próximos, que lles mostren que a arte tamén pode ser un camiño vital e profesional.

Aquí vos deixamos un vídeo resumo dalgúns deses momentos cheos de cor, emoción e aprendizaxe:

Grazas a todas as persoas que nos visitaron por facer da escola un espazo aínda máis creativo e inspirador. Seguiremos enchendo as aulas de arte e expresión!

Unha mañá deliciosa con tortitas integrais!

 Esta semana, na aula de Educación Infantil, vivimos unha experiencia moi saudable: preparamos as nosas propias tortitas usando fariña integral! As nenas e os nenos participaron en cada paso da receita, desde medir os ingredientes ata ver como se cociñaban as tortitas e por suposto, saboreándoas con mel, sirope de arce e un pouquiño de chocolate 🫣

O resultado foi unha merenda riquísima e un momento compartido cheo de aprendizaxes. Foi todo un éxito!

 

 

Eduemprende- programa Atrévete

 O alumnado de 5° e 6° de Educación Primaria visitou hoxe o CIFP Politécnico de Santiago de Compostela a través do Programa Eduemprende- Atrévete a ter unha idea, onde coñeceron diversas ofertas formativas fomentando así o seu pensamento emprendedor.

 

 

 

Lingua materna e día da poesía

  Feliz día da poesía e da lingua materna 🫶🏼 da man de “Queco Fresco”, Diversos con Versos.

Actividade que nos ofrecen desde o concello, para o alumnado de 5° e 6°. Un achegamento para fomentar a súa creatividade, sensibilidade e capacidade de expresión 📖

Micro aberto pola lingua materna

 Celebramos a lingua materna con cancións, refráns e moita diversión con micro aberto!

Foi unha xornada chea de creatividade e alegría, onde os nosos nenos e nenas puideron mostrar o seu talento e amor pola lingua galega dunha maneira única.

Durante toda a xornada, tiveron a oportunidade de achegarse á biblioteca e tomar o micrófono para compartir cos seus compañeiros/as o que máis lles gusta da nosa lingua: cancións, poesías, refráns e ata chistes, todo en galego. A imaxinación e o bo humor non faltaron!

Os demais compañeiros tamén puideron gozar como espectadores, alentando aos seus amigos/as e compañeiros/as nun ambiente de apoio e celebración. Foi unha experiencia divertida, enriquecedora e chea de risas que nos permitiu conectar coas nosas raíces e valorar a riqueza da nosa lingua materna.

Esta actividade non só foi unha oportunidade para poñer en práctica o galego de maneira divertida, senón que tamén nos lembrou o importante que é preservar e transmitir a nosa lingua ás novas xeracións.

Grazas a todos os que participaron e a quen nos acompañou como público!

 

 

 

 

📰✨ Semana da Prensa: nace o Xornal de Conmeniño

 Con motivo da Semana da Prensa, o noso alumnado transformouse en pequeno equipo xornalístico para dar vida ao noso propio medio escolar: o Xornal de Conmeniño.

Durante varios días, mergullámonos no mundo do xornalismo:
 Escribimos noticias
 Fixemos fotos
 Investigamos fontes
 Reflexionamos sobre o que acontece no noso entorno escolar

Os contidos do xornal xiraron arredor das diferentes conmemoracións e actividades celebradas no centro ao longo do curso.

 

 

 

Cada sección foi creada con ilusión, traballo en equipo e moitas ganas de comunicar. Esta experiencia axudou ao alumnado a desenvolver a súa capacidade crítica, expresiva e creativa, ademais de entender mellor o papel da prensa e a importancia da información.

O Xornal de Conmeniño é unha mostra do que pasa no noso cole… contado polos seus protagonistas!

VIII Concurso 8M

 En relación con convivencia e benestar do alumnado, este ano quixemos participar no VIII Concurso que a Consellería propón para o deseño do cartel do día 8 de marzo co gallo da celebración do Día Internacional da Muller. 

O obxectivo foi promover a reflexión sobre os estereotipos de xénero que aínda existen na sociedade, as causas e a orixe da discriminación así como o camiño que as mulleres tiveron que percorrer para ver recoñecidos os seus dereitos. 

Este foi o cartel elixido entre o noso alumnado participante, para enviar ao concurso: